प्रत्यक्षदर्शी भन्छन्, ‘आँखै अगाडि यस्तो दुर्घटना कहिल्यै देखिएको थिएन’

ByRocket Reporter

१ माघ २०७९, आईतवार १२:३२ १ माघ २०७९, आईतवार १२:३२ १ माघ २०७९, आईतवार १२:३२

‘घरको आँगनमा घाम तापेर कुर्सीमा बसिरहेको थिएँ, आइतबार बिहान ११ बजे एक्कासि जहाज घरको छतलाई नै छुनेगरी उत्तरतर्फबाट कोल्टिँदै आयो। हेर्दाहेर्दै घरको एक सय मिटर पूर्वको सेती डिलको बाँस घारीमा ठूलो आवाज दिँदै बजारियो। जहाजको एक टुक्रा म बसिरहेको कुर्ची नजिकै आएर बजारियो,’ जहाज दुर्घटना स्थलको एक सय मिटर पश्चिम स्यालदुले निवासी ८७ वर्षीय बबरजंग गुरुङले भने, ‘आँखै अगाडि यस्तो दुर्घटना कहिल्यै देखेको थिइनँ।’

‘जहाज बजारिएपछि आगोको मुस्लोसहित धुवाँले गाउँ नै ढाक्यो। केही समयपछि पुलिस र आर्मी आइपुगे। मसहित मेरो परिवार र वरपरका छिमेकीसमेत ठूलो कालले बाच्यौँ भनेर घरभित्र पस्यौँ तर आगो फैलिन्छ कि भन्ने चिन्ता झन् बढ्न थाल्यो। पछि जहाजमा लागेको आगो नियन्त्रणमा आयो,’ उनले भने।

सेती खोँचको पूर्वी भागमा डिलको बाँसको थानमा बजारिएको विमानका केही टुक्रा सेती खोँच वारि, केही टुक्रा पारि र केही टुक्रा खोँचमा खसेका छन्। शवहरू केही डिलमा अड्किएको भए पनि अधिकांश सेती खोँचमा नै खसेका छन्।

आज बिहान पोखरा अन्तर्राष्ट्रिय विमानस्थल नजिकै नयाँगाउँको खोँचमा विमान दुर्घटना भएको थियो। विमानमा ६८ यात्रु र ४ जना चालक दलका सदस्यसहित ७२ जना सवार थिए। दुर्घटनाग्रस्त ९ एन–एएनसी विमान पोखरा अन्तर्राष्ट्रिय विमानस्थलमा अवतरण गर्ने क्रममा पुरानो र नयाँ विमानस्थलबीचको नयाँगाउँस्थित सेतीको खोँचमा दुर्घटनामा परेको थियो।

दुर्घटनास्थल नजिकै नयाँगाउँ निवासी विष्णुहरि सापकोटाले भने, ‘उत्तरतर्फको काहूँ डाँडातर्फबाट पुरानो विमानस्थलमा आज जहाज आयो भनियो। तर, जहाज पुरानो विमानस्थलबाट पश्चिम मोडेर नयाँ विमानस्थलमा लाने क्रममा एक्कासि ढलपल ढलपल हुँदै सेती नदीको खोँच डिलको बाँसको थानमा छुन पुग्यो। अनि ठूलो आवाजसहित भुइँमा खस्यो। हामी दौडेर त्यहाँ पुग्दा आगोको मुस्लोसहित धुवाँ आइरहेको थियो,’ उनले भने।

‘दुर्घटनास्थलमा जानसक्ने अवस्था थिएन। केही समयपछि आएका सुरक्षाकर्मीले पानीको फोहोराले आगो निभाउने प्रयास गरे। केही समयपछि आगो नियन्त्रणमा आएको भए पनि सेती खोँचमा रहेको लास जलेको गन्ध आइतबार दिनभरि आइनै रहेको छ,’ सापकोटाले थपे।सेती खोँचको पूर्वी भागका एक दर्जन घर विमानचालकले बचाएर सेती खोँचमा खसालेको अनुमान स्थानीय प्रीति गुरुङ गर्छिन्।

अर्की प्रत्यक्षदर्शी स्थानीय मनिषा परियारले भनिन्, ‘हामी त घाम तापेर बसिरहेका थियौं। जहाज कोल्टे–कोल्टे हुँदै आयो। के भएछ भनेर हेरियो,’ उनले भनिन्, ‘त्यसको एकैछिनमा जहाज गति गुमाउँदै भुइँमा खस्यो। बचाउ-बचाउ भन्ने आवाज सुनियो। अनि त हामी झनै आत्तियौं।’

विमान कोल्टे परेको दुई-तीन मिनेटमै सेतीको खोँचमा ठोक्किएको उनले बताइन्। विमान खोँचमा खसेकाले बस्ती जोगिएको उनको भनाइ छ। ‘कोल्टे–कोल्टे हुँदै वारि ठोकिएर पारि जोतिन पुग्यो, अनि आगो बल्न सुरु भइहाल्यो,’ मनिषाले भनिन्, ‘धन्न हाम्रै घरमाथि खसेन जहाजको क्षति त हुन्थ्यो नै हाम्रो पनि बिचल्ली हुन्थ्यो।’

आगो बल्न थालेपछि बाल्टीमा पानी लिएर गए पनि उद्धार गर्न नसकेको उनले बताइन्। केही स्थानीयले प्रहरीलाई खबर गरे पनि जलिरहेको जहाज हेर्नुभन्दा अर्को उपाय नभएको उनको भनाइ थियो। ‘एकैछिनमा आगो बल्न सुरु भयो। हामीले बाल्टीमा पानी बोकेर त गयौँ तर त्यसले के हुन्थ्यो?’ उनले भनिन्, ‘कसैले प्रहरीलाई फोन गर्न तिर लाग्यौं। केही छिनमा बोरिङको ट्यांकर पनि आयो त्यसपछि दमकल, एम्बुलेन्स, प्रहरी, आर्मी सबै आए। अनि बल्ल हामीलाई बाँच्नेहरू बाँच्छन् कि भन्ने भयो।’

पोखराको सेती खोँचमा आज बिहान भएको विमान दुर्घटनामा परेकामध्ये ४:३० बजेसम्म ६२ वटा शव निकालिएको जिल्ला प्रहरी कार्यालय कास्कीका प्रहरी प्रमुख अजय केसीले जानकारी दिए।

दुर्घटनामा पर्ने यतीको उक्त विमान पोखराको अन्तर्राष्ट्रिय विमानस्थलमा पहिलोपटक अवतरण गर्ने विमान थियो। उक्त विमानलाई यती एयरलाइन्सका वरिष्ठ क्याप्टेन कमल केसीले उडाएका थि । क्याप्टेन केसी प्रशिक्षक पाइलट पनि हुन्। यही विमानबाट पोखरा अन्तर्राष्ट्रिय विमानस्थलमा पहिलो ‘डेमो’ उडान गरेका थिए। नेपालमा ७२ यात्रु क्षमताको एटीआर विमान दुर्घटना भएको यो पहिलो घटना भएको बताइएको छ।

उक्त विमानमा चालक दलका सदस्यहरू कमल केसी, अञ्जु खतिवडा, सृजना होंगचुन र ओसिन आले मगर थि । जहाजमा नेपाली ५३, भारतीय नागरिक पाँच, रसियन चार, आयरल्यान्डका एक, अस्ट्रेलियन एक, अर्जेन्टिनी एक, कोरियन दुई, फ्रान्सेली एक गरी ६८ यात्रु र चालक दलका चार सदस्य थिए । जहाज खोँचमा परेकाले उद्धारमा कठिनाइ आएको उद्धारमा खटिएका सुरक्षाकर्मी बताउँछन्। रासस

 


(Source: Pardafas)

Leave a Reply

Your email address will not be published. Required fields are marked *